Om Setesdalssida
Setesdalssida.no er ein nettstad drive av meg, Geir Daasvatn, med mål om å presentere heimplassen min og Setesdal på verdsveven på min eigen måte og så godt eg kan.
Dei tekniske og visuelle løysingane – webdesignet – står min gode ven Inge Fredriksen for. Det er altså glimt av Setesdal sett med mine augo, presentert på ein fengande måte av Inge, me vil prøve å få til.
«Framsnakke» Setesdal
Eg ønsker sterkt å «framsnakke» Setesdal etter mi beste evne. Eg er glad i heimplassen min i Evje & Hornnes, og i Setesdal. Eg vil gjerne bidra til
- at me som bur her skal bli endå stoltare av heimplassen vår,
- at endå fleire og aller helst ungdomar – skal få augene opp for det gode livet i dalen,
- og at endå fleire finn ut at det kan vere ein veldig spennande stad å besøke.
Innhald
Me vil starte forsiktig, og utvide med meir innhald etter kvart som me ser korleis det går. Men aktuelt stoff er slikt som:
- Turtips/turløyper
- Attraksjonar i dalen
- Presentasjon av nokre folk/verksemder/stader
- «Litt av kvart» (omtale av arrangement, bilde, kåseri/meiningsytringar, spesielle hendingar, merkedagar, osv.)
Setesdalssida er ikkje ei nettavis, med dagleg dekning av alt som skjer i Setesdal. Me har vår eiga lokalavis, «Setesdølen», som skriv om det som hender frå dag til dag på ein god måte.
Litt om meg
Eg, Geir Daasvatn, er fødd i 1961. Eg er utdanna jurist. Men for 15-16 år sidan blei eg sjuk med uforklart kronisk utmatting. Nokre år seinare var eg også gjennom ein alvorleg kreftsjukdom.
Eg måtte slutte i arbeidet mitt, og blei etter nokre år uføretrygda. Eg har vore sterkt involvert i frivillig arbeid i heile det vaksne livet mitt, særleg innan fotballen i Otra IL.
I dag har eg trappa ned dette engasjementet ganske mykje på grunn av utfordringar med helsa. I staden håpar eg å kunne bruke ein del av tida mi til å presentere Setesdal på ein fin måte her på Setesdalssida.no.