Med ein kanonkamp og siger 21–13 på bortebane mot Lillesand laurdag sikra Otra-gutane 2. plassen i serien. Dei er det nest-beste handballaget i G-14-klassen på Sørlandet denne sesongen.
Lillesand var ein tøff motstandar. Men denne kampen hadde gutane frå Evje & Hornnes psyka seg noko veldig opp til på førehand. Dei ville verkeleg vinne! Etter ein jamn start, der laga skifta på å ha leiinga, festa Otra meir og meir grepet framover mot pause. Glimrande keeperspel og eit solid forsvar som jobba tett saman la eit godt grunnlag. Framover briljerte Sherif Safar med ni mål i kampen (eitt på straffekast) og Theo F. Hasic med fire mål.
– Men det er laginnsatsen som har imponert meg mest i dag, fortalde ein svett men gledesstrålande trenar Elisabeth Skjæveland etter kampen. Kvar og ein gjorde ein kjempeinnsats, og eg er verkeleg stolt av gutane nå!
Elisabeth trener laget saman med Tina Frimanslund.
Til pause stod det 12–7 i Otra sin favør.
Solid 2. omgang
I andre omgang var det framleis tøff kamp. Gutane frå Lillesand gjorde det dei kunne for å ta innpå. Men dei kom ikkje nærare enn 8-12. Otra var svært solide også i denne omgangen, og kunne dra den kjærkomne sigeren trygt i land. Til øyredøyvande jubel på både tribunen og banen skorte Nils Marius Olsen sitt aller første mål for laget. Theo F. Hasic avslutta kampen med eit kanonskudd. 21-13 til Otra!
Eit stort heimepublikum – og eit litt mindre men desto meir høglytt langvegsfarande publikum som støtta Otra – sette ei veldig fin ramme rundt kampen. Med kjempestore stykke med sjokoladekake og fengane musikk sørga heimearrangøren for at det var ei fin feststund for handball i Møglestuhallen.
Vinnar av seriespelet i G-14, A-serien, 2024/2025 framføre Otra er Øyestad.
Otra sitt lag: Anders Nicolaysen og Karl Magnus Tveitå (målvakter), Lukas Fredriksen, Nils Marius Olsen, Rami Hicham Saqualla, Shadi Safar, Sherif Safar, Hans Abusland, Eskil Hodne, Theo Frimanslund Hasic
To solide dommarar: Eirik Kristiansen og Rolf Albert Kristiansen.
Kampinfo hos Norges Handballforbund Sluttabellen
