Torsdag kveld blei Kristina Merete si sjølvutviklingsbok innan seksuell helse, «Lyst på livet», lansert på Dølen Hotel på Evje.
Kristina Merete sitt fulle namn er Kristina Merete Støvik, men i boka omtalar ho seg bare med førenamnet.
Salen på Dølen var smekkfull av spente tilhøyrarar, kanskje rundt 60 i talet. Det var ei overvekt av vaksne kvinner, men også nokre menn.
I boka, er det sagt i førehandsomtalen, tek Kristina Merete deg med på ei reise i kvinner sin seksualitet. Gjennom ei heilskapleg tilnærming stiller ho modige spørsmål og delar raust av eigne erfaringar. Med hjelp av historiar og øvingar leiar ho deg trygt på vegen mot å eige din eigen kropp, slik at du kan finne glede, styrke og lyst på livet.
Sterk historie
Kristine Merete si mamma, Ann Kristin Davidsen, innleia kvelden med ei sterk historie om sitt eige liv. Det var for å gje eit «bakteppe» for boka. Kristin Brokke, kunstnar med bustad i Brokke i Hylestad, song vakkert og intenst. Ho heldt fram med historia om kor mykje Kristina Merete sitt 12-månadersprogram, Kvinneportalen UnderLivet, hadde hatt å bety for at ho sjølv kunne endre livet sitt til det bedre. Ho gjekk ganske grundig gjennom dei 12 trinna i programmet. Inspirerande og engasjert innlegg!
Bokbad
Det var klart for bokbad! «Bokbadar» Ingrid Mydland lurte på kven Kristina Merete eigentleg var, og oppfordra henne til å fortelje litt om seg sjølv. Eg kan ikkje gå inn på alt som kom fram. Eg skal også vere såpass ærleg, at eg ikke klarte å få notert alt heller. Men Kristina Merete hadde «utsletta seg sjølv», meinte ho, for å passe inn. Ho var – enkelt sagt – ikkje seg sjølv. Ho sleit med depresjon, og mellom anna hadde heile familien vore i saman på eit opphald på Modum Bad. Ho var 32 år gamal, hadde svært liten sjølvtillit og forstod ikkje si eiga verd, som ho seier det i føreordet i boka.
Etter opphaldet på Modum Bad byrja ho sakte men sikkert å oppdage ting som endra på alle sider ved livet hennar. Resten er historie, kan me mest seie. Det var rørande å vere på Dølen under boklanseringa, og tenke på den lange reisa det hadde vore for Kristina Merete – og familien hennar – før ho kom hit. Ei reise frå alt det vonde i oppveksten til der ho sat framfor oss alle no, med boka i handa. Ja, eg trur eg vil bruke hennar eigne ord – ho har oppdaga si eiga superkraft!
Kristina Merete ønskte sterkt, heldt ho fram, at alle menneske skal skjøne kva for ei stor kraft me har. Me har ho i oss. Me må bare få ho ut! ALLE kan me få til endring i liva våre, om me ønsker det.
Intervjuer Ingrid avslutta med å ta av seg hatten for Kristina Merete og boka hennar. Ho understreka at ho meinte boka var like viktig for menn som kvinner, og avslutta:
«Det er klokt og modig det du har gjort, Kristina!»
Dansing the night away!
Før me gjekk heim fekk kvelden ei festleg avslutning med dans i alle mogelege slags variantar, sprudlande leia av Inger Liyana Sandring.
Til sals hos Norli Evje og Nordli-butikkane over heile landet
Solveig Eiken i Norli Evje var til stades heile kvelden, og selde masse bøker. På Norli Evje og alle andre Nordli-bokhandlar i landet er boka nå i handelen. Eg har ikkje rokke å lese meir enn innleiinga og litt omtale her og der. Så nokon bokmelding har eg ikkje å tilby. Eg nemner at Christin Dahl har vore redaktør, design og lay-out er ved Hilde K. Ingvaldsen og dei vakre bileta står fotograf Karina Lange for. Nor Forlag er utgjevar. Setesdal Regionråd har støtta utgjevinga. I Setesdølen si tysdagsutgåve på papir og på Setesdolen.no er det eit veldig bra stykke om Kristine Merete og boka, skrive av Sigrid Åsen Haugsgjerd. Om boka er like god, inspirerande og lærerik som lanseringa på Dølen var, er det bare å springe rett i bokhandelen for å byrje på eit særs givande lese- og kanskje livsendringsprosjekt.
Kristina Merete Støvik er utdanna barnevernspedagog med vidareutdanning i pedagogikk, spesialpedagogikk, psykisk helsearbeid, rus og avhengighet. Ho har 15 år med arbeidserfaring. i privat og kommunal sektor og i spesialhelsetenesten. Ho har i tillegg utdanna seg til mindfullness-instruktør, yogalærar, holistisk sexolog og tantralærar, med spesialisering i feminin seksualitet og bruken av yoniegg. Du kan lese mykje meir om henne i eit eige kapittel bak i boka.