Gloppefossen er ein rundt 280 meter høg foss i Valle kommune. Han er ein av dei høgaste fossane i Setesdal.
Nå skal det i rettferdas namn seiast at høgda på fossen er mykje diskutert. I nokre kjelder er ho sagt å vere 230 meter, i andre 280 meter. Atter andre meiner høgda er sterkt overdriven, og at ho «bare» er 120 meter. Høgda på ein foss kjem dessutan ann på korleis me definerer ein «foss». Er det bare det tilnærma loddrette fallet som skal målast, eller heile fossen frå der han fell utfor fjellkanten til botnen av dalen? I Wikipedia si liste over dei høgaste fossane i Norge kan du lese mykje meir om dette.
Fossen er ein del av Veiåni, som kjem frå Husebøvatnet. Vassføringa er stor i fossen heile sommarhalvåret, så fossen er verd å sjå òg i turkeperiodar. I det heile teke er både fossen og det mektige Veiågjuvet ei stor naturoppleving.
Stykket held fram under biletet
Korleis kjem du hit
Du kan parkere på ein liten parkeringsplass like ved Riksveg 9 rett nord for Lunden camping. Det er ei lita avgift, 50 kr, som du kan betale med Vips eller kontant. Frå parkeringsplassen er det merka turstig inn Veiågjuvet til fossen.
Første delen av turen går på grusveg, med ganske jamn stigning. Sidan vert det traktorveg. Til slutt går det ein smal stig gjennom skogen det siste stykket opp til fossen. To plassar undervegs kryssar du Veiåne. Begge stadane er det temmeleg nye bruer, slik at kryssing av elva skal gå greit. Turløypa har fått endra klassifisering frå raud til grøn etter at bruene kom.
Det er ein flott natur med høge fjell på begge sidene av elva Veiåne. Turen tek om lag to timar. Han er om lag seks km lang t/r.
Eit alternativ
Du kan også gå inn til toppen av fossen den korte avstanden frå Fylkesveg 450 ved Bakkebui (sjå stipla linje på kartet). Det tek bare fem minutt eller noko slikt.
Sjå også
Meir om Setesdal
Allemannsretten gjev oss fantastiske mogelegheitar til å oppleve og å bruke naturen rundt oss. Dette har vi full rett til, så lenge vi tek omsyn til grunneigar, kvarandre, planter og dyr. Så vis alltid omsyn og ver varsam når du ferdast ute i skog og mark. Naturen er vårt felles skattkammer!