Den frivillige foreininga FRIROM STUDIO bygger opp lydverkstad og studio for ungdom og vaksne i Hornnes hjelpefengsel.
Eg var ein kjapp tur innom det erverdige gamle fengselet i Dåsnes fredag ettermiddag for ein liten prat om arbeidet. Eg traff på Geir Wick (styreleiar) og Alexander Låstad i full sving med målarkostane. Saman med tredjemann i foreininga, Bent Ivar Depui Tversland, held dei på med å male opp fengselsfløyen i bygget.
Fengslande lydverkstad!
Her inne mellom dei gamle fengselscellene har FRIROM STUDIO alt stelt i stand sitt eige lille krypinn. Så er det altså på sikt planen å få til ein topp utstyrt lydverkstad her, gjerne kombinert med det som trengs av utstyr for å dyrke foto- og filminteresser og andre kreative fag. Sjølve skildrar dei ynskja og dei overordna måla sine slik:
– Å etablere en profesjonell, kreativ arena i Evje og Hornnes kommune der ungdom og unge voksne kan oppnå faglig innhold, erfaring og mestring gjennom musikkproduksjon og skaperglede. Målet er å være et kulturtilbud og et fristed for ungdom som søker et alternativ til de «vanlige» fritidsaktivitetene.
Målgruppa deiras er primært ungdom og unge vaksne i Evje og Hornnes som har eit ynskje om å uttrykke seg kreativt, men som kanskje fell utanfor dei meir tradisjonelle fritidsaktivitetane.
FRIROM STUDIO sit på mykje kompetanse på området og vil freiste å ta ein mentorrolle som aktivt oppmuntrar unge til å produsere innhald, heller enn berre å konsumere kultur. Tilbodet er ikkje meint som ein tradisjonell ungdomsklubb, men som eit kulturelt fleirbrukstilbod med fokus på barn og unge vaksne.
Nært samarbeid med venneforeininga
Karane i FRIROM STUDIO har etablert eit nært og godt samarbeid med Hornnes hjelpefengsels venner som har det overordna ansvaret for å oppgradere og utvikle heile fengselet og det vakre naturområdet rundt. Som alt nemnt tek dei på seg dugnadsarbeid langt utover sitt eige lille krypinn. På årsmøtet i venneforeininga tidlegare i april blei også Geir Wick og Bent Ivar Depui Versland vald inn i styret. Så dette er personar som verkeleg brenn etter å få til noko stort i bygget saman med alle dei andre gode kreftene som alt har vore i sving i fleire år. Ein dag i overskueleg framtid står «Dåsnes kultur- og fleirbrukshus» endeleg der, det er eg temmeleg sikker på.
Vatn og toalett m.v.
Det er straum inn til fengselet, men ikkje innlagt vatn og avlaup. Det blir arbeidd med den saka. Fram til desse viktige funksjonane er på plass ligg FRIROM STUDIO litt lågt med planane sine. Det er lite praktisk å drive ein stor aktivitet i bygget utan tilgang på vatn og toalett m.v.
Men så snart dei grunnleggjande funksjonane i bygget er på plass vil gutane i FRIROM STUDIO gå breiare ut med tilbodet sitt. Eg gledar meg til å følge ferda deiras vidare!
Meir om Hornnes hjelpefengsel på Setesdalssida
SPLEIS FOR MAC OG INTERNETT
For å drive ein funksjonell lydverkstad er det trong for ein kraftig arbeidsstasjon (Mac) til å spele inn og lage musikk på. Internett-tilgang er òg eit «must». Foreininga har difor sett i gang ein SPLEIS-aksjon, der du som ynskjer å støtte arbeidet dei gjer kan bidra litt.