Tvillingsystrene Ingelin & Hildegunn i Garness er ute med sitt nye album «Restart», og hadde vald Syrtveit Gard som ein viktig stoppestad på sjølvaste release-turnéen.
Duoen frå Bergen spelar melodiøs indie/folk/pop på dialekt, og har m.a. samarbeida med Marit Larsen, Sigvart Dagsland og Odd Nordstoga.
Vertskapet på Syrtveit, Inger Lise Stulien Robstad – og kjærasten Olav, skal ha så uendeleg mange takk for ein særs triveleg kveld. Dette er dei verkeleg gode på. Venesæle og gjestfrie. Det perfekte vertskap. Rykande fersk og stuttreist gjærbakst, kaffe i koppen og ein flott velkomstkonsert av yngste sonen i huset, Endre (14). Ein triveleg gut – og ein framifrå spelemann på både munnharpe og hardingfele.
Det var lunt og triveleg i kulturstova denne onsdagskvelden. Folk kom frå Grimstad, Mandal – og sjølvsagt mange frå dei indre bygder på Agder.
Det vart ein minnerik og sjeldan flott konsert med Garness. Tekster til ettertanke. Reflekterte jenter – og publikum som til tider vart reven med i både allsang og taktfast klapping.
Etter konserten var det mange som rusla over tunet og tok seg inn i det nye stabburet. Her finn ein ei utstilling av m.a. bunader og stakker, måleri, rosemåla fat og kister – og så mykje, mykje meir. Endå eit – av mange spanande kulturtilbod på Syrtveit Gård.
Den offisielle nettsida til Garness
