Garden ligg ved breidda av Otra, og er nabogard til Austre Hodne i Iveland.
Biletet er teke frå Austre Hodne. Me ser i nord-vestleg retning over Otra mot Brotet og Hodnemoen (bakerst).
Vestre Hodne er gnr. 25 i Evje og Hornnes kommune. Garden ligg altså heilt sør i kommunen, langs vestbreidda av Otra sør for Moisund, i det som iallfall litt tilbake i tida blei kalla Otradalen.
Plasseringa av garden nede i dalbotnen, på den beste jorda langs Otra, og det naturgjevne namnet, tyder på at han er svært gamal, truleg mellom dei eldste i Hornnes.
Litt historie
Gardsgrensene for Hodne (Horne) i Iveland og Klepp i Evje går over i kvarandre. Det same er det for gardsgrensene mellom Hodne og Moi i Hornnes. Det skal ikkje vere funne gravhaugar på korkje Hodne-gardane eller Klepp. Men det er eit stort gravfelt på Moi. Den store, lokale gardkjennaren Oddmund Mogstad har reist spørsmål om gravfeltet på Moi kan vere felles gravfelt for heile området?