Trass i det litt «brutale» namnet, finst det små idyllar overalt i Skrikarjuvet!
Skrikarjuvet er eit smalt og djupt juv som Hovassåna renn gjennom før ho munnar ut i Åraksfjorden. Juvet er fullt av kjempestore, mosegrodde steinar, nedramla tre og busk og kratt, og helst litt tungvindt å ta seg fram i. Men her blei det bygd eit lite kraftverk som var i drift 1922–1939, og her var kvernhus.
I juvet ligg framleis betongdammen etter Åraksbø kraftverk igjen i åna. Litt ovafor dammen er eitt av mange små og litt større fall som elva gjer gjennom juvet. Fossen og den vesle kulpen framforbi er som ein liten, idyllisk oase i det litt «røffe» landskapet elles, tykker eg.
Det «slørete» inntrykket av vatnet i fossen kjem av at eg har stilt kameraet inn med lang lukkartid, her 1 sekund. Eg synest det ofte kan lage eit fint bilete. Det er vel det næraste eg kjem å ha litt «kunstnerisk sans»!