Arbeidet med Skjerka kraftverk starta opp i 1930. Det blei bygd ein kraftstasjon i dagen, med røyrgate ned fjellsida frå Ytre Skjerkevatn.
Kraftstasjonen ligg ved vestbreidda av Ørevatn, om lag to km frå Eikerapen.
Det gamle kraftverket hadde først tre, og seinare seks aggregat. Produksjonen starta i 1932. Årsproduksjonen var i gjennomsnitt 492 GWh. Utbygginga var den første store i Mandalsvassdraget. Dei gamle aggregata står framleis i stasjonen, og skal kunne brukast i periodar med ekstra stor tilgang på vatn.
Stor utviding under 2. verdskrigen
I mars 1938 vedtok fylkestinget å utvide kraftanlegget, med oppdemming av Nåvatn. Arbeida tok til i 1939, og stod ferdige i 1943. Då var det bygd to nye fleirbogedammar og to platedammar i søre enden av Nåvatn.
Ny stasjon i fjellet
Det blei så bygd ny kraftstasjon på Skjerka i 1997. Den nye stasjonen er sprengt inn i fjellet. Du kan skimte inngangen heilt til venstre i biletet.
Å Energi Vannkraft eig Skjerka kraftverk.
Kulturminne
Som en heilskap er kraftanlegget gitt vern som eit av kulturminna i norsk kraftproduksjon. Noko av grunngjevinga for dette er at stasjonen syner kontinuiteten i kraftutbygginga, med gamal kraftstasjon i dagen og ny i fjellhall, dessutan med dei opphavelege aggregata, i tillegg til at ein kan finne to turbintypar (Pelton- og Francis-turbinar) i same stasjon.
Kjelder
- Utbyggingen av Skjerka kraftverk i Åseral. Et historisk tilbakeblikk, utgjeve av VAE Energi AS, 2000
- Artikkelen om Skjerka kraftverk på Setesdalswiki