Austadburet står på gardsbruket Der heime (gnr. 13 bnr. 8) på Nordre Austad i Bygland.

«Av folk på garden er huset kalla bur. Det kan likevel ikkje vera tvil om at det frå gammalt må ha vore kalla loft», skriv Egil Berg i Norske minnesmerker – Norske tømmerhus frå mellomalderen.

Grunnen til det er venteleg at bygget har gått over frå å vere eit kombinert sove- og forrådshus til å bli eit reint forråds- og lagerhus.

Før Svartedauden

Mykje av laftinga er findalshogg, som ifølge Berg må vere gjort før 1350 (Svartedauden). Det er også innslag av raulandshogg i bygget. Det er ein nyare lafteteknikk. Forklaringa kan kanskje vere at bygningen er reparert etter at findalslafting er gått i gløymeboka.

Buret er ved C14-analyse tidfesta til ca år 1344. Det er då eitt av dei eldste i Setesdal. Det er automatisk freda.

Om du køyrer nordover gjennom Austad ser du lett buret på di høgre hand noko etter at du har passert den gamle kyrkjegarden.

Kjelder

• Egil Berg, Norske minnesmerker – Norske tømmerhus frå mellomalderen, band V, utgjeve av Riksantikvaren, Landbruksforlaget Oslo, 1995, side 40-47
• Reidar Vollen, Bygland gard og ætt, band III, utgjeve av Bygland kommune, 2005, side 177
• Artikkelen om Austadburet på Setesdalswiki