Eg er veldig fengsla av den gamle høybua rett i nærleiken av rasteplassen på Skarsmo, litt nord for Byklestøylane, i Bykle.
Fargane på landskapet – og bua – skiftar så fint etter årstidene. Eg kjenner meg alltid litt spent når eg nærmar meg denne staden. «Korleis ser bua ut i dag, tru?»
Eg har fått vite av Tor Hallvard Mosdøl at bua høyrer til familien sitt gardsbruk Kultran nede i Kyrkjebygda. Ho er frå den tida bøndene måtte hente vinterfôr i utmarka. Dei slo myrer og andre stadar det var gras om sommaren, og henta høyet heim med hest og slede om vinteren. Dei hadde ikkje nok fôr på innmarka.