Heddeviki var ein husmannsplass litt opp i den bratte i lia rett aust for Heddeneset tunnel, nord for Åraksbø i Bygland.
Det er ein av dei eldste husmannsplassane ein kjenner til i Bygland, med busetjing frå tida rundt 1720.
Frå først av skal buplassen ha vore nede ved Åraksfjorden. Då det kom folk på staden igjen på 1800-talet blei husa sette opp lenger oppe i den bratte lia, om lag 100 meter opp frå fjorden.
Rydningsmannen i Heddeviki heitte Anders Person Heddeviki (død 1753). Han var gift med ei som truleg heitte Anne Persdotter. Fem barn etter dei er kjende, men det kan ha vore fleire.
Noko som er heilt visst, er at det er mange etterkomarar etter folka i Heddeviki, både i Setesdal og andre stader.
Reidar Vollen
Etter at Anders Person var død, er det ein periode på 100 år, til 1850-talet, før det er tale om Heddeviki igjen. Plassen blei fråflytta for godt rundt 1909. Alle detaljane omkring dette kan du lese i den framifrå Bygland gard og ætt.
Frodig natur
Det er eit svært rikt planteliv og rik edellauvskog i Heddeviki, og området går inn i Heddeviksfjell naturreservat.
Kjelder
- Reidar Vollen, Bygland gard og ætt, bind V, utgjeve av Bygland kommune, 2008, s. 189–199
- Artikkelen om Heddeviki på Setesdalswiki
Rett i nærleiken
- Skore – garden
- Skore – gamlevegen
