På Sanden Såre i Lunden nord i Valle ligg ei lang strekning med idyllisk, gamal setesdalsveg att i skogen langs Otra, nå som bubilcamp.
Postvegen, den første ordentlege køyrevegen for hest og kjerre oppover i Setesdal, blei ferdig til Valle kyrkje i 1844–1846. Men der stoppa arbeidet opp. Folk i øvre delen av Valle og heile Bykle måtte framleis bruke kløvhest for å frakte varer. Det var veldig tungvint. Men viljen til å kome vidare nordover med vegen var laber. «Iallfall når det skulle løyvast over kommunebudsjettet», skriv Leonhard Jansen i praktverket Frå postveg til riksveg – vegar og vegminne langs riksveg 9 (s. 164).
Men i 1865 blei det endeleg vedteke å be amtet (fylket) godkjenne opparbeiding av køyreveg opp til Bykle. Arbeidet kom i gang, og i 1879 var vegen framme ved Bykle kyrkje.
Bygd i 1873
Nord i Lunden, ved Sanden Såre mellom Brokka og Vormeviki, gjekk den gamle kløv- og ridevegen langs breidda av Otra. Den nye køyrevegen, med ei lita bru over Veiåne, blei bygd forbi her rundt 1873. Den nye vegen må då ha vore ei oppgradering av den eldre ridevegen.
Brua blei bygd om til ei stålbjelkebru i 1927. Vegen og brua på Sanden Såre var i bruk som setesdalsveg til 1963. Då blei vegen flytta litt oppover (austover) i terrenget, til der Riksveg 9 går nå.
I dag er Sanden Såre ein idyllisk bubilcampingplass.
Gloppefossen m.m.
På andre sida av Riksveg 9 for Sanden Såre er det parkeringsplass og startpunkt for turløypa som går gjennom det mektige Veiåjuvet til den høge Gloppefossen. Langs Veiåne, litt oppover i skogen, ligg det fleire vakre, gamle kvernhus. Langs breidda av Otra nede på bubilcampen kan du sjå ein av dei store steinskjermane som er att etter tømmerflotinga på elva.
Kjelder
- Leonhard Jansen, Pål Arnfinn Haugen, Olav Røysland og Harald Tallaksen, Frå postveg til riksveg – vegar og vegminne langs riksveg 9, Bokbyen Forlag, 2018, s. 160 og kart nr. 25 bak i boka
- Artikkelen om den gamle vegsløyfa på Kulturminnesok.no
