Eg har ofte undra meg på historia bak den vakre steinmuren langs elva ved Landeeika. Nå har Eystein Greibrokk hjulpe meg ut av uvita!
Planlegginga av Landeskogen tuberkulosesanatorium i Grendi tok til tidleg på 1900-talet. Eit ledd i planane var å bygge kraftstasjon som skulle forsyne anlegget med straum.
Kraftverksplanane
Tanken var då å utnytte vatnet i Nordåna og bygge kraftstasjon nedanfor Husbakkfjellet, skriv Eystein i det spennande og veldig fine stykket Forglemmegei – vandring langs Nordåna i Grendi i 2026-utgåva av Setesdal og setesdølar, årsskriftet til Setesdal sogelag.
Ved Hodron, på toppen av Saurbrunsfossen, skulle dammen vere. Her blei det kila ut stein til dammen.
Kraftverket ved Nordåna blei etter kvart lagt bort. I staden blei det bygd på Longerak. Der står stasjonen som eit mellomalderslott den dag i dag.
Kor blei det av steinen?
Den utkila steinen – som opphaveleg altså skulle blitt til dam for kraftverket – blei i staden frakta ned til Lande og mura opp langs elva ved Landeeika. Det er like på nedsida av Riksveg 9.
Så neste gong du vil sjå til Landeeika kan du samstundes gå bort til elvekanten og beundre den nydelege steinmuren! Er du sprek til beins kan du hoppe ned på den greie sementkanten under muren og beundre han på nært hald.
Kjelder
- Eystein Greibrokk, Forglemmegei – vandring langs Nordåna i Grendi, stykke i Setesdal og setesdølar 2026, side 104–111
