Køyreveg frå Valle til Bykle kom først på 1870-talet. Ved Skorpetveit nord i Valle kan me framleis sjå ei lang sløyfe av gamlevegen.
Postvegen – den første ordentlege køyrevegen for hest og kjerre – stod ferdig fram til Valle kyrkje i 1846. Vidare nordover til Bykle var det framleis ikkje køyrbar veg. Først i 1865 blei det litt fart i planane om køyreveg til Bykle. Arbeidet kom i gang på byrjinga av 1870-talet. I 1879 stod vegen endeleg ferdig fram til Bykle kyrkje.
Skorpetveit
Under Skorpetveitfjellet, mellom Vormeviki og Reimarmoen heilt nord i Valle, blei vegen bygd rundt 1873. Han var i bruk til 1922.
Gamlevegen ligg framleis godt synleg i landskapet, rett på austsida av Riksveg 9. Delar av vegstykket er skjult bak ein svær rasvoll som er bygd i nyare tid.
Treng du ein liten pause på køyreturen? Då er dette ein fin stad å stanse bilen og trekke litt frisk luft, medan du spaserer ein kort tur «paa gjengrodde stier».
Kjelder
- Artikkelen om gamle setesdalsvegen på Kulturminnesok.no
- Leonhard Jansen m.fl., Frå postveg til riksveg – vegar og vegminne langs riksveg 9, 2018, s. 163–167 og kart nr. 25 bak i boka
Du vil kanskje også sjå
- Postvegen – Flåstrondi
- Postvegen Uppstad–Flårenden
- Den gamle steinvegen i Flårenden
- Postvegen i Bjørnaråkleiva
- Byklestigen
