Storstraumen er eit av dei finaste og best kjende kulturminna i Bygland. Biletet her er frå ein annan vinkel enn dei mest vanlege.
Dei fleste går nok ikkje inn under den vakre steinkvelvbrua frå 1915 for å fotografere. Men eg har vore forbi Storstraumen mange gonger for å kikke etter fine motiv. Då er det litt spennande å sjå om eg kan finne nye vinklar å ta bileta frå.
Eg har vore inn under 1915-brua før for å prøve å få til eit bra bilete. Men det har liksom ikkje blitt heilt slik eg har tenkt eller håpa. Denne gongen – ein septemberdag i 2022 – var eg heldig, med at det var heilt blikk stille på fjorden. Eg synest speglingane i vatnet tilfører biletet litt ekstra liv.
For å få med såpass mykje av brua og landskapet bak har eg brukt eit vidvinkelobjektiv på kameraet. I ettertid har eg lysa opp skuggepartia noko i bildebehandlingsprogrammet på PC-en.
