I Hovden jernvinnemuseum får du på ein svært livaktig måte oppleve korleis vikingane laga jern.
Museet er ei avdeling/utstilling under Setesdalsmuseet. Det ligg i det idylliske Hegni friluftsområde ved Hartevatn, rett sør for Hovden sentrum.
Fjellgardane øvst i Setesdal har vore gjennom omfattande utbyggingar i dei fire tiåra etter at Hovden etablerte seg som eit gigantisk vintersportsområde sist i 1960-åra. Omfattande arkeologiske utgravingar og registreringar har vore nødvendig. Desse har synt at Fjellgardane i perioden 800–1300 var eit sentralt område for utvinning av jern av myrmalm.
Særeigen atmosfære
Du kan ikkje sjå meg, for eg har vore død i snart 1000 år.
Forteljarstemma i museet
På slutten av 1980-talet vart det sett i gong eit prosjekt med å bygge hus over eit utgrave jernvinneanlegg. Museet har fått ein heilt særeigen atmosfære, der kunnskapen om jernvinna blir formidla gjennom illustrasjonar på veggane, ljos-, lyd- og lukteffektar. Ein forteljarstemme leiar deg trygt gjennom museet, medan han steg for steg fortel korleis utvinninga av jernmalmen gjekk føre seg. Det er ei svært interessant historie!
Jernvinnemuseet er sjølvbetjent. Spør om nøkkelkode på Turistkontoret på Hovdetun i Hovden sentrum (telefon 482 27 235).
Kjelder
- Artikkelen om jernvinnemuseet på Setesdalswiki
- Brosjyre på jernvinnemuseet
Meir om jernvinnemuseet
- Om Hovden jernvinnemuseum og Vikingvegen på Hovden.com
- Om jernvinnemuseet og Vikingvegen hos Visit Sørlandet