Den gamle vegbrakka som står ved innkøyringa til Geiskeli blei brukt under vegarbeidet i Bykle på 1920-talet.

Opphaveleg var bua sett opp av dei to skogspekulantane Berke og Foss, for dei store tømmerdriftene i Berdalsskogane. Då stod bua lenger sør, ved Berdalsbru.

Helleik Sigbjørnsson Glidbjørg (f. 1876, d. 1974) skal ha flytta frå garden og ned til denne brakka ved (den dåverande) riksvegen, då sonen Salmund Gjeiskelid og kona Anne overtok gardsdrifta rundt 1959. Salmund og brørne hans var alle motstandsmenn under 2. verdskrigen.

Bua er i dag nokså autentisk, heiter det i Kulturminneplanen for Bykle.

Kart over området

Kjelder

• Kulturminneplan for Bykle 2016–2019, s. 12
• Aanund Olsnes, Heimar og folk i Bykle, bind II, utgeve av Bykle kommune, 2006, s. 76