Nomelandshaugen er ein gravhaug på Nomeland, på vestsida av Otra, i Valle.
Haugen har eit tverrmål på om lag 35 meter, og ei høgde på ca 3,5 meter.
Den nordlege delen, ca. 1/3 av haugen, er planert ut til ca 1 meter over dyrka mark med eit steingjerde langs kanten.
Nomelandshaugen er det største kjende gravminnet i Valle, og skal også vere den største bevarte gravhaugen i Aust-Agder. Dateringa er til jernalder.
Det rike Nomelandsfunnet frå sein vikingtid skriv seg truleg frå denne haugen.
Kor finn du haugen?
Nomelandshaugen ligg altså på vestsida av Otra, tvers ovafor Valle sentrum, og er lett tilgjengeleg frå Strondevegen. Han ligg rett sør for Prestefossen hengebru, i eit unikt kulturlandskap. Her går Prestefossen tursti i tre sløyer, etter å ha starta i Valle sentrum. Du kan legge ut på ei vandring, ja ei spennande kulturhistorisk reise, gjennom 1000 år! Men den reisa får bli tema i eit eige stykke, når våren er komen og snøen borte.
Nomeland–Valle sentrum på Norgeskart.no
Kjelder
- Leonhard Jansen og Alfred Ryningen, Valle kommune VII, Kultursoge 1, utgjeve av Valle kommune, 1994, side 35–36
- Alfred Ryningen, Valle kommune III Gards- og ættesoge Valle, utgjeve av Valle kommune, 1987, side 604–605
- Om Nomelandshaugen på Kulturminnesok.no
- Zanette Tsigaridas Glørstad, Gravskikk og rituell praksis i jernalderen i Setesdal, artikkel i Spor i Setesdalsjord, Bokbyen Forlag, 2014, side 43 flg.
- Artikkelen om Nomelandshaugen på Setesdalswiki
Rett i nærleiken
Meir om Setesdal
