På Flateland nord i Valle gjekk den første køyrevegen innom der Oveinang grendehus ligg i dag.
Postvegen, den første ordentlege køyrevegen for hest og kjerre oppover i Setesdal, blei ferdig til Valle kyrkje i 1844–1846. Men der stoppa arbeidet opp. Folk i øvre delen av Valle og heile Bykle måtte framleis bruke kløvhest for å frakte varer. Det var veldig tungvint. Men viljen til å kome vidare nordover med vegen var laber. «Iallfall når det skulle løyvast over kommunebudsjettet», skriv Leonhard Jansen i praktverket Frå postveg til riksveg – vegar og vegminne langs riksveg 9 (s. 164).
Men i 1865 blei det endeleg vedteke å be amtet (fylket) godkjenne opparbeiding av køyreveg opp til Bykle. Arbeidet kom i gang, og i 1879 var vegen framme ved Bykle kyrkje.
Stykket held fram under biletet
Bygd rundt 1873
Frå Rotemo til nord om Flateland blei køyrevegen lagt i same låma som den gamle Dalevegen (ridevegen). Han må såleis ha vore ei utbetring av den eldre vegen. Utbetringa skjedde rundt 1873.
Etter å ha passert Flatelandsåne på bru tok kjerrevegen av mot høgre i høve til dagens Riksveg 9. Han gjekk gjennom skogen inn mot det gamle skulehuset, og kom ut igjen rett før vegkrysset til Rygnestad.
Det er såleis ikkje eit langt vegstykke me taler om her, bare nokre få hundre meter. Men i følge noteringane på Kulturminnesok.no var vegen i bruk til 1930. Då blei han lagt litt mot vest, om lag der Riksveg 9 går no.
Rett aust for gamlevegen ligg det svære Flatelandsmoen gravfelt, eitt av dei største i Setesdal.
Kart over området (gamlevegen er grå, stipla linje fram til skulehuset)
Kjelder
- Leonhard Jansen, Pål Arnfinn Haugen, Olav Røysland og Harald Tallaksen, Frå postveg til riksveg – vegar og vegminne langs riksveg 9, Bokbyen Forlag, 2018, s. 159–160 og kart nr. 24 bak i boka
- Artikkelen om den gamle vegsløyfa på Kulturminnesok.no
