På Hedde i Hylestad gjekk Postvegen forbi på oppsida av den svære Heddessteinen.
«Postvegen» blei han altså kalla, den første ordentlege køyrevegen i Setesdal. Han var køyrbar med hest og vogn fram til Valle i 1844, og heilt ferdig i 1846. Han blei formelt avlevert i 1847. Vegane før dette var for gåande og kløvhestar, og hest med slede der det var mogeleg.
Forbi Hedde i 1942
Forbi Heddessteinen kom vegen rundt 1842. Dette er rett sør for den staselege garden Haugan, som Egil Åmlid eig. Det er det sørlegaste gardsbruket på Hedde.
Vegen var veldig smal der han låg tett inntil den svære steinblokka. Om du møtte ein buss her, var det bare såvidt du kom forbi.
Vegen var i bruk heilt til 1994. Då blei han flytta nærare elva, over på andre sida av steinen. Seinare, i 2021, er han flytta endå lenger ut mot elva, til den nye Riksveg 9 som me susar forbi på i dag.
Heddessteinen
Både Heddesteinen og ein anna bautastein litt lenger nord på Hedde – ei steinpil – er minne etter Skjoldmøyane, dei vidkjende kvinnelege krigarane. Dei kasta steinane etter Heilag-Olav då han for gjennom Setesdal for tusen år sidan og ville kristne sæbyggjane.
Kjelder
- Leonhard Jansen, Pål Arnfinn Haugen, Olav Røysland og Harald Tallaksen, Frå postveg til riksveg –vegar og vegminne langs riksveg 9, Bokbyen Forlag, 2018, s. 142
- Artikkelen om gamle setesdalsvegen forbi Heddessteinen på Kulturminnesok.no
- Artikkelen om Heddessteinen på Setesdalswiki