Turistheimen slik han står i dag er bygd ca. 1909. Men den laftebygde 1. etasjen er truleg frå ca. 1887, då det først kom turiststasjon på Ose. Han er den eldste turiststasjonen i Setesdal som framleis er i drift.
Ose Turistheim er eit intimt lite hotell med 6 gjesterom og 14 senger. Både innvendig og utvendig har turistheimen behalde sin originale karakter. Her får du òg servering av heimelaga tradisjonsmat.
Agder Overnatting ved Roald Klungland leiger bygget av Bygland kommune. Signe Røinås har drive verksemda i over 20 år, og står framleis for dagleg drift. Det er ein fabelaktig reportasje om henne og Ose Turistheim i Fædrelandsvennen sitt jolemagasin i desember 2024, og på FVN.no, skrive av Birgitte Klækken og med nydelege foto signert Lena Lislevand (betalingsmur).
Opningstidene er ikkje faste. Verksemda er stengd delar av året (om vinteren). Søndag 1. desember var siste opningsdag i 2024. Sjekk Facebooksida til Ose Turistheim for oppdatert informasjon.
Spennande på Ose
Ose var eit travelt sentrum i Setesdal tilbake i tid. Her er eit sjeldan bygnings- og kulturmiljø. Tvers over vegen for Turistheimen ligg den særmerkte Storstoga frå 1600-talet. Eit høgdepunkt om sommaren er det tradisjonsrike Ose Matmarknad.
Kjelder
- Reidar Vollen, Bygland gard og ætt, bind III, utgjeve av Bygland kommune, 2005, s. 579–590
Sjå også
- Heimesida til Turistheimen
- Om Ose Turistheim hos Visit Sørlandet/Setesdal
- Om festivalbygda Ose hos Visit Sørlandet/Setesdal
