Ved Lisletjønn, på veg innover mot Bossvatn i Bykle, er det ein ganske intakt bunkers og maskingeværstilling som tyskerane bygde under 2. verdskrigen.
Stillinga var truleg meint å skulle sikre den nord-vestre flanken til hovudstillinga, som var ved Byklestigen. Men verken hovudstillinga ved Byklestigen eller stillinga her ved Lisletjønn var fast bemanna med tyske soldatar under krigen.
I ein rapport om tyske forsvarsverk i Bykle kommune heiter det:
– Tyskerne la hovedtyngden av stillingene i Byklestigen vendt mot sør for å stoppe en fiende på veg mot Oslo fra sørlandskysten. I tilfelle en fiendtlig styrke kom fra nord var det ikke lagt opp til å forsvare stedet nevneverdig utfra en vurdering gjort i høsten 1942. Sannsynligvis har det etter kort tid blitt gjort en revurdering av det strategiske bildet med oppføring av en nordre flankestilling ved Lisletjønn.
Type anlegg
Bunkersen ved Lisletjønn er ein mannskapsbunkers i armert betong og bølgeblekkseksjonar. I tillegg er det eit løpegravsystem i armert betong med maskingeværstilling rett ved bunkersen og to maskingeværstillingar i armert betong på andre sida av Nordbygdevegen.
Korleis kjem du hit
Frå Riksveg 9, rett sør for Bykle kyrkjebygd, svingar du vestover mot Nordbygdi og Bossvassdammen. Du kjem først forbi Storetjønn, og nokre hundre meter seinare til Lisletjønn. Her vil du sjå bunkersen mellom vegen og tjønna.
Kjelder
- Kulturminneplanen for Bykle 2016–2019
- Kartlegging av tyske forsvarsverk i Bykle kommune, rapport utarbeidd av Tormod Christiansen i samarbeid med Bykle kommune, 2017
Du vil kanskje også lese
Meir om Setesdal
